Këngëtari nga Shqipëria, Sinan Hoxha, i cili nga dikush kritikohet për stilin muzikës që e bën, të tjerët e dëgjojnë me ëndje- por mbi të gjitha ai i mbush sallat ku këndon- ka reaguar ndaj kritikëve të tij duke thënë se nuk ka muzikë të mirë dhe muzikë të keqe.

“Muzikë komerciale ka bërë Madonna gjithë jetën dhe është kritikuar gjithnjë, por ajo mbetet mbretëresha e pop-it. Karamelja mbahet në gojë… Unë vetëm në Shqipëri dëgjoj të flitet për muzikë të mirë dhe muzikë të keqe. Muzika është muzikë, ato janë nota dhe vetëm një injorant mund të thotë që notat janë të mira, apo të këqija. Po, kam bindjen se këto kritika bëhen nga këngëtarë të pasuksesshëm në stilin e tyre”, ka thënë Sinani në një intervistë për gazetën Shekulli.

Për më shumë, Sinani ka njoftuar se aktualisht është duke punuar një këngë të re, një bashkëpunim me një këngëtare kosovare, të cilës nuk ia ka përmendur emrin, por ka thënë që kënga do të jetë e gatshme në dhjetor.