Universiteti Shtetëror i Tetovës ka hedhur poshtë njoftimet në media për përjashtimin eventual nga sistemi i Bolonjës. Zëdhënësi i USHT-së tha se Universiteti është në kontakte të vazhdueshme me përfaqësues të sistemit arsimor të Bolonjës dhe se deri më tani nga ta nuk ka pasur vërejtje.

Edhe nga kabineti i Ministrit të Arsimit mohojnë të ketë arritur një gjë e tillë diçka e tillë ndaj USHT-së. Prej atje thonë se kanë kontrolluar arkivin dhe ndonjë shkresë me vërejtje sa i përket USHT-së, por nuk ka pasur një gjë të tillë.

“Dezinformatat se gjoja USHT-ja rrezikon të përjashtohet nga Karta e Bolonjës aspak nuk janë të vërteta. Këtë e themi pasi në USHT nuk ka arritur asnjë lloj njoftimi, asnjë lloj shkrese me të cilën do të njoftoheshim me këtë problematikë. USHT-ja është institucion i cili në vazhdimësi komunikon me drejtuesit e Bolonjës dhe ne respektojmë parimet, ne respektojmë sistemin e Bolonjës dhe këtu aspak nuk ka të vërtetë”, deklaroi zëdhënësi i USHT-së, Selam Sulejmani.